മാര്‍ത്തോമ്മ ,തിരുവല്ല 3 ക്വാര്‍ട്ട്‌സ്‌ കോഴിക്കോട്‌
0
മൂവാറ്റുപുഴ:
മൂവാറ്റുപുഴ മുന്‍സിപ്പല്‍ സ്റ്റേഡിയത്തില്‍ നടക്കുന്ന കേരള
പ്രീമിയര്‍ ലീഗ്‌ ഫുട്‌ബോളില്‍ വനിതാ വിഭാഗം കിരീടം മാര്‍ത്തോമ്മ കോളേജ്‌ തിരുവല്ല
കരസ്ഥമാക്കി. ക്വാര്‍ട്ട്‌സ്‌ വിമന്‍സ്‌ കോഴിക്കോട്‌ റണ്ണേഴ്‌സ്‌ അപ്പായി.
ഇന്നലെ നടന്ന ലീഗിലെ അവസാന മത്സരത്തില്‍ തോല്‍വി അറിയാതെ മുന്നേറിയ
ക്വാര്‍ട്‌സ്‌ വിമന്‍സ്‌ എഫ്‌.സി കോഴിക്കോടിനെ മറുപടി ഇല്ലാത്ത മൂന്നു
ഗോളുകള്‍ക്ക്‌ മാര്‍ത്തോമ്മ കോളേജ്‌ പരാജയപ്പെടുത്തി. മാര്‍ത്തോമ്മയ്‌ക്കു വേണ്ടി
പി.കെ സുചിത്ര രണ്ടു ഗോളുകളും സുബിത ഒരു ഗോളും നേടി.
റൗണ്ട്‌ റോബിന്‍ ലീഗിലെ
ആദ്യ രണ്ടു മത്സരങ്ങളും ജയിച്ചു ആറ്‌ പോയിന്റോടെ ഒപ്പത്തിനൊപ്പം നിന്നിരുന്ന
തിരുവല്ലയും കോഴിക്കോടും തമ്മിലുള്ള മത്സരം ഫൈനലിനു തുല്യമായി മാറിയിരുന്നു.
എന്നാല്‍ ആവേശം കത്തിനില്‍ക്കുമെന്നു പ്രതീക്ഷിച്ച മത്സരം നനഞ്ഞ പടക്കമായി.
ആദ്യ ഒന്‍പത്‌ മിനിറ്റിനുള്ളില്‍ തന്നെ കളിയുടെ വിധിയെഴുതി.
രണ്ടാം മിനിറ്റല്‍
മാര്‍ത്തോമ്മ കോളേജിന്റെ 19ാം നമ്പര്‍ ജേഴ്‌സിയണിഞ്ഞ സുബീത പൂവട്ട ആദ്യ
വെടിപൊട്ടിച്ചു. ഒന്‍പതാം മിനിറ്റില്‍ 24-ാം നമ്പര്‍ ജേഴ്‌സിയണിഞ്ഞ പി.കെ സുചിത്ര
രണ്ടാം ഗോളും നേടി. ഗോള്‍ മടക്കാനുള്ള ആവേശം ഒന്നും കാണിക്കാതെ കീഴടങ്ങിയ
നിലയിലായിരുന്നു കോഴിക്കോടിന്റെ വനിതകള്‍. ആദ്യ പകുതിയില്‍ വിരലില്‍ എണ്ണാവുന്ന
നീക്കങ്ങള്‍ നടത്തിയതൊഴിച്ചാല്‍ കളി ഏറെക്കുറെ കോഴിക്കോടിന്റെ പകുതിയില്‍
തമ്പടിച്ചു.
രണ്ടാം പകുതിയിലും മാര്‍ത്തോമ്മയുടെ അധിപത്യത്തിനു മുന്നില്‍
കോഴിക്കോട്‌ അടിയറവ്‌ പറഞ്ഞു.
80-ാം മിനിറ്റില്‍ പി.കെ സുചിത്ര രണ്ടാം ഗോള്‍
കൂടി നേടിയതോടെ പോരാട്ടത്തിനു തിരശ്ശീല വീണു.
ഇന്നു നടക്കുന്ന പുരുഷ വിഭാഗം
ഗ്രൂപ്പ്‌ ബി- മത്സരത്തില്‍ എസ്‌.ബി.ടി തിരുവനന്തപുരം, കൊച്ചിന്‍ പോര്‍ട്ട്‌
ട്രസ്‌റ്റിനെ നേരിടും.
കഴിഞ്ഞ ദിവസം നടന്ന പുരുഷ വിഭാഗം ഗ്രൂപ്പ്‌ എയിലെ
മത്സരത്തില്‍ ഇന്റര്‍ ക്ലബ്‌ ചാമ്പ്യന്മാരായ കേരള പോലീസ്‌ ടൂര്‍ണമെന്റിലെ ഏക
ജയത്തോടെ പുറത്തായി.
അവസാന മത്സരത്തില്‍ പോലീസ്‌ ഒന്നിനെതിരെ രണ്ടു
ഗോളുകള്‍ക്ക്‌ എഫ്‌.സി കേരള,തൃശൂരിനെ പരാജയപ്പെടുത്തി.
കേരള പോലീസിനു വേണ്ടി
ശ്രീരാഗും (26-ാം മിനിറ്റില്‍ ) രാഹുലും (81-ാം മിനിറ്റില്‍), എഫ്‌.സി കേരളതൃശുരിനു
വേണ്ടി ശ്രേയസും (7-ാം മിനിറ്റില്‍ ) ഗോള്‍ നേടി.
ഇതുവരെ ഒരു ജയവും
സ്വന്തമാക്കാന്‍ കഴിയാത്ത ഇരു ടീമുകള്‍ക്കും മത്സരം ചടങ്ങ്‌ തീര്‍ക്കല്‍
മാത്രമായിരുന്നു. മുന്‍ രാജ്യാന്തര താരം ഐ.എം.വിജയനെ തന്നെ ടീമില്‍ അണിനിരത്തിയ
കേരള പോലീസ്‌ ഈ ഒരു ആശ്വാസജയത്തോടെ എഫ്‌.സി കേരളയോടൊപ്പം ടൂര്‍ണമെന്റില്‍ നി്‌ന്നും
പുറത്തായി. ഐ.എം.വിജയന്‍ ഇന്നലെ കളിക്കാനിറങ്ങിയില്ല.
ഗ്രൂപ്പ്‌ എയില്‍ നിന്നും
ഒന്‍പത്‌ പോയിന്റോടെ സെന്‍ട്രല്‍ എക്‌സൈസ്‌ കൊച്ചി ഒന്നാം സ്ഥാനക്കാരായി
സെമിഫൈനലിലേക്കു യോഗ്യത നേടിക്കഴിഞ്ഞു. . ആറ്‌ പോയിന്റോടെ ഏജീസ്‌ തിരുവനന്തപുരം
രണ്ടാം സ്ഥാനത്തും എത്തി.
No comments:
Post a Comment